Ko e Tala ʻo e Kavá

Ko e Tala 'o e Kavá ʻoku taku ko e fatuʻanga ia ʻo e nofo fakafonua ʻa e Tongá. Ko e ʻēseni ʻo e Tala ʻo e Kavá ko e tauhi tu'i līʻoa ʻa ha ongo mātuʻa ko Fevanga mo Fefafa ʻi ha taimi ne honge lahi ai e fonuá, ʻo na feilaulau ai ʻe na tamá ko Kava, ke tauhi ko e taumafa ʻa e Tuʻitongá.

ʻE lava pē ke tau pehē ʻoku kehekehe pē anga ʻo e vakai ki he Tala ʻo e Kavá ʻo fakatatau ki he feituʻu ʻoku fai mei ai ʻa e vakaí. Ko Houʻeiki mo Haʻa Taki Fonua, ʻe ʻi ai pē ʻenau mahuʻingaʻia he talá ni he koe fakamaʻunga ia ʻo e faʻahinga tauhi moe feilaulau ʻoku pukepuke ʻaki honau tuʻungá ʻi he fonuá. Ko Haʻa Tauhi Fonua ʻe ʻi ai mo ʻenau mahuʻingaʻia ʻi he talá ni he ko ʻenau maʻuʻanga moʻuí ʻoku makatuʻunga ʻi he tōʻonga tauhi tuʻunga ko eni ʻa e fonuá. ʻOku ʻi ai moe toko lahi ʻoku nau laukau ʻaki hono tō ʻe he talá ni ʻa e moʻui feilaulaú pea mo e tauhi tuʻií ʻi he moui ʻa e Tongá. ʻOku ʻi ai mo e faʻahinga ʻoku nau fakameʻapangoʻia kinautolu ʻi hono tekenaki mo fakatolonga mai ʻe he talá ni ʻa e fakamoʻulaloa ʻo Haʻameʻavale ʻi he moʻui ʻa e Tongá. Pea toe ʻi ai mo e faʻahinga ʻoku ʻikai ke nau fuʻu tokanga kinautolu ki ha faʻahinga ʻuhinga, tukukehe pē ʻa e fakaʻofoʻofa faka-hisitōlia mo e kei tolonga lelei mai ʻa e Tala ʻo e Kavá.

Ko e hā pe ha faʻahinga vakai ki he Tala ʻo e Kavá, ʻoku kei ongoongoa tatau pē ʻa e taʻahine ko Kavá ʻi he moʻui ʻa e Tongá.
Pea ko fē pē ha feituʻu ʻe laka atu ki ai ʻa e kahaʻu ʻo e Tongá , ko ʻe ne laka atu pē mei he faʻitoka ʻo Kavá.


Ko e Tala ʻoe Kava



James Cocker 14Nov00