Ko e Fai Kavá mo e 'Ilo Kavá

Ko e fai kavá ko hono ui ia 'o e ngaahi fakataha'anga kava kotoa 'oku hoko he fonuá. Naʻe toe ui pē ko e mamakava. Tukukehe ha fakataha'anga kava ne me'a ai 'a hou'eiki, 'a ia ne ui ia ko e 'Ilo Kava. Pea ko e Taumafa Kavá leva na'e toki ui pē ko e Taumafa Kava 'o kapau naʻe 'afio tonu ai 'a e Hau 'o e Fonuá.

Ko e ngaahi taimi ne fakahoko ai e faikavá mo e 'ilokavá na'e kau ai ha 'eva 'a ha talavou ki ha finemui, ko e palupalu 'a ha mātu'a 'i ha katoanga pe 'apisia, kau ai e fakanofo hingoa, pe ma'u mata'itohi, pea pehē foki ki ha faʻa fakataha pē 'a e mātu'á hangē ko eni 'oku hoko atu pe 'i he ngaahi kalapu kavatonga 'o e 'ahó ní.

Ko e fai kavá na'e ʻikai ko ha fakatahaʻanga ʻo fafine, naʻa nau faʻa fakataha kinautolu ki fale kokaʻanga, tukukehe pē ha fefine ne taumuʻa ki ai ha uiui kava, pe ko ha kau touʻa fefine, pe ko ha kakai fefine ne kaifono 'i ha taumafa kava. Ka ne ʻi ai pē kau fefine ʻi he taimi kehekehe ʻo e hisitōliá naʻá nau palupalu pē mo kinautolu.

James Cocker 14Nov00