Koe Tala ʻoe Kavá

Koe Tala 'oe Kavá ʻoku taku koe fatuʻanga ʻoe nofo fakafonua ʻae Tongá.  Koe ʻēseni ʻoe talá ni koe tauhi tu'i līʻoa ʻa ha ongo mātuʻa ko Fevanga mo Fefafa ʻo na feilaulauʻi ai ʻena tamá ko Kava ke hoko koe taumafa ʻae Tuʻitongá.

ʻE lava pē ke tau pehē ʻoku kehekehe pē anga ʻoe vakai ki he Tala ʻoe Kavá fakatatau ki he feituʻu ʻoku fai mei ai ʻae vakaí.  Ko Houʻeiki mo Haʻa Taki Fonua ʻe ʻi ai pē ʻenau mahuʻingaʻia he talá ni he koe ʻēseni eni ʻoe faʻahinga tauhi moe feilaulau ʻoku pukepuke ʻaki honau tuʻungá ʻi he fonuá.  Ko Haʻa Tauhi Fonua ʻe ʻi ai mo ʻenau mahuʻingaʻia he talá ni he ko ʻenau maʻuʻanga moʻuí ʻoku tuifio ʻi hono hikihikiʻi ʻo Houʻeiki mo Haʻa Taki Fonuá.  ʻOku ʻi ai moe toko lahi ʻoku nau laukau ʻaki hono tō ʻe he talá ni ʻae moʻui feilaulau moe tauhi tuʻī ʻi he moui ʻae Tongá.  ʻOku ʻi ai moe faʻahinga ʻoku nau fakameʻapangoʻia hono tekenaki mo fakatolonga mai ʻe he talā ni ʻae moʻulaloa moe fakamoʻulaloa ʻo Haʻameʻavale ʻi he moʻui ʻae Tongá.  Pea toe ʻi ai moe faʻahinga ia ʻoku ʻikai ke nau sio kinautolu ki ha faʻahinga ʻuhinga ka nau mālieʻia pē kinautolu ʻi he tala ʻoe Kavá.

Koe hā pe ha faʻahinga vakai ki he Tala ʻoe Kavá, kuo ongoongoa ʻae taʻahine ko Kava ʻi he moʻui ʻae Tongá.  
Pea ko fē pē ha feituʻu ʻe laka atu ki ai ʻae kahaʻu ʻoe Tongá , ko ʻene laka atu ia mei he faʻitoka ʻo Kavá.


Koe Tala ʻoe Kava



JamesCocker14Nov00