'I ha folau ia 'e taha 'a Tuita moe kau toutai 'ae Tu'itongá, na'a nau afāngia ai 'i tahi. Pea ko ʻenau liu mai ko iá kuo mahaehae honau valá. Na'a nau ongoʻi ta'efe'unga ai ke nau foki atu ki he 'afio'anga (nofo'anga) 'oe Tu'itongá. Ko ia naʻe to'o hifo ai 'e Tuita 'ae laa 'oe vaká 'o nau vahevahe 'o vala 'aki, pea nau toki hifo atu ʻaki moe ola 'oe toutaí ki 'uta.

'I he 'afio atu 'ae Tu'itongá ki heʻenau fotu mai, na'e mokoi (fiefia) hono finangaló ki he sīpinga vala fo'ou ne tu'uta mai 'aki 'e Tuita moe kau toutaí. Ne tupu leva mei ai 'ae ta'ovala 'ae Tongá, koe faka'apa'apa ki he Tu'i, pea kuo hoko ia koe faka'ilonga fakafonua 'oe faka'apa'apa 'ae Tonga 'i ha fa'ahinga ha'ofanga pe.