Koe Sika ʻa ʻAmá


Koe Sika ʻa ʻAmá koe talanoa ki he tupuʻanga ʻo Limapō, koe faʻē ʻa Ngatá, ʻae fuofua Tuʻikanokupolú, pea moe tupuʻanga ʻo Motuʻapuaka moe Kanolotoʻāʻoehaú, Haʻa Molofahá, Fale Haʻa Kilí, pea mo ʻAkauola mo Fulivai.

 

ʻOku makatuʻunga e fakamatalá ni ʻi he vahevahe ʻa Kolo Fakaanga ʻo Nomuka, koe matāpule ʻa Tupoutoʻa.  Koe vahevahe 'a Kolo Fakaangá  mei he fakamatala ʻa Veʻehala Leiluá.  ʻOku ʻoatu e fakamālō mavahe kia Kolo Fakaanga pea mo Veʻehala Leilua.

Koe fakamatalá ni koe fokotuʻutuʻu ʻa James Cocker, koe tānaki mei he ngaahi fakamatala kehekehe, pea ʻoku hokohoko atu pe hono okookó.  Koe taumuʻa ʻoe fokotu’utu’ú ni, koe feinga ke fakahoa mo fakafāʻutaha ʻae ngaahi fakamatala, ngaahi tohi hohoko, pea moe lele ʻae taimilainé, ke maʻu ha fakamatala ʻoku ne makupusi ʻae mālie ʻoe talatupuʻá, mahuʻinga ʻoe hisitōliá, pea moe fehokotakí fakaekāinga ʻoe fonuá.

  


ʻOku pehē ne ‘i ai e Tu’i Tutu’ila ‘i Ha’amoa ko Maneafaiga.  Pea koe taha ‘oe ngaahi hoa ‘o Maneafaiga koe fefine ko Fetunu, koe tuofefine ia ‘oe ‘eiki ko Molofasa.  Ko Molofasa ko ení naʻe toe ʻiloa ko Tau’ili’ili

Na’e fanau’i leva ‘e Fetunu kia Maneafaiga ha ta’ahine pea ui ko Soli’ai Sina’omanini.  Pea fu’u lahi hake 'a Soli’ai Sina’omanini koe ta’ahine hoihoifua.  Pea ‘ave ia ki he ‘eiki 'o Safata 'i 'Upolu 'i Ha'amoá, ko ʻAmalele, ʻa ia ne toe ʻiloa ko ʻAma. 

Na’e fanau’i leva ‘e Soliʻai Sinaʻomanini kia 'Ama ha ongo tamaiki fefine ko Limapō mo Fā’ogenu’u, mo hona tuonga’ane ko ʻAma Pesetā.  Pea mālōlō leva ‘a Soli’ai Sina’omanini ‘oku kei iiki ‘ae fanaú. 

Pea fai atu e nofó, kuo lalahi e fanaú, pea hūloto ‘ia ʻAma ke ‘i ai hano hako ‘eiki ‘i Tonga.  He tā koā ko ʻAmá, koe hako ʻoe Tuʻitongá mei he kuonga ne ʻafio ai e Tuʻitongá ʻi Haʻamoá.  Ko ia ne fekau leva ʻe ʻAma ke teuaki ha folau ke ʻave ʻaki hono ʻofefiné, ʻa Limapō ki Tonga.
 
Koe kau folaú leva eni. 

Ko Limapō mo hono tehiná, ʻa Fāʻogenuʻu, ko hono feʻao.  

Koe ʻuli vaká, koe Kaivai Ha’amoa ko La’auma’alava

Koe kau fakafeʻao mei he fahaʻi tamai pea moe fahaʻi faʻē ʻae ongo tamaikí.  

Mei he fahaʻi tamaí, koe fototehina ‘o ‘Ama, ko Nāpa‘a, Fa‘oa, Monū mo Lei’ataua, mo honau kāingá. 

Mei he fahaʻi faʻeé, koe fanga foha ‘o Molofasa Tau’ili’ili, ko Kamoto, Uhi, Kioa mo Ngalungalu, koe fānau-‘a-tu’a-sina ia ‘a Soli’ai Sina’omanini, fa’ē ‘a Limapō mo Fāʻogenuʻú, pea mo honau kāingá. 

Naʻe fakahekeheka moe toutai ika ʻa ʻAma naʻe ʻiloa ko Sanini koe toutai ʻatu.  Naʻe heka pe ʻa Sanini mo ʻene fuʻu kumeté.  Ko ʻene toutai ʻatu pe he vahá ʻo tauhi ki ai, koe ʻoho ʻoe folaú.  
 
Ko ia ne nau tukufolau mai ʻo nau hake atu ki Muʻa, pea tali lelei ai e fuʻu folauhaʻamoá ni.  Na'e mokoi foki moe finangalo ʻoe Tu’iha’atakalaua ko Moʻungatongá ki he Taupou ko Limapō, pea ne ʻave ia ko hono hoa.  Pea fakatalutalu ʻaki ʻe houʻeiki kuo holoakifonua ʻae Sika ʻa ʻAmalele ʻo Safatá.  
 
Na’e ʻikai fuoloa mei ai kuo tu’itu’ia ‘a Limapō.  Pea hoko atu moe kaikaiʻāfua.  Pea fai atu ʻo māmālohi mai ko ia ʻa Tohuʻiá, kuo toe tu‘itu‘ia mai mo Fā’ogenu‘u.  Tā koā kuo hōifua kakato ʻe Tuʻihaʻatakalaua ia ki he Sika mei Safatá.  

Pea ʻi he ongó na atu kia Tohuʻia ʻae tuʻituʻia hono tehiná, na’e ‘ikai ke ne kei mapukepuke ʻa ʻene fuaʻá.  Pea ne fekau ke ‘ave ‘a Fā’ogenu’u ʻo tuku he mamaʻo tahá.  Pea koe kuonga ko ia ne 'i ai e motuʻa naʻá ne tauhi e lafu puaka ʻae Tuʻí.  Koe motuʻa ko Mafi Fenunuʻivao, pea naʻá ne nofo he motu ko Fukavé.  Pea naʻe fetukutuku leva ki ai siʻi Fāʻogenuʻú, moe fekau kia Mafi Fenunuʻivao ke ne tauhi. 
 
Ne hoko atu leva ai e nofó.  Pea fai angē kuo fanau ‘a Tohu’ia koe tamasiʻi tangata, pea ui 'e he hou'eikí ko Ngata.  Pea fakatalutalu ai pe ʻa houʻeikí moe fonuá, he kohai ia ʻe toe aleaua moe Sika ʻa ʻAmá, he kuo tahuli ʻo hoko koe ʻalo ʻoe Tuʻíhaʻatakalauá.  
 
Pea ne ʻikai fuoloa mei ai, kuo fanau mo Fā’ogenu‘u ʻi Fukave.  Pea fanauʻi koe tamasiʻi tangata pe mo ia.  Pea ui pe ‘e Mafi Fenunu’ivao mo Fā'ogenu'u ko Mafi.
 
Kae kehe koe fuʻu folau tokolahi foki ne muimui mai ʻia Tohuʻiá.  Pea fekau ʻe he houʻeiki ke nau oo ʻo nofo mai mei muifonua.  Ne nau nofo leva ki ai, pea nau ui honau nofo’angá ko Tatakamotonga, koe ʻenau tākanga moe Tongá.  Pea nau femouʻekina ai pe mei ai hono fakahikihiki ʻenau tamasiʻí, ʻae tamasiʻi ko Ngatá.  

Pea fai mai e nofo, pea kuo ʻiloa ʻa Laʻaumaʻalava ko ʻAkauola, koe fakatonga pe ia hono hingoá, pea tuifio ai moe fakaola ʻoe Sika ʻa ʻAmá.  Koe kaivai taukei foki ʻa ʻAkauola, pea ne takitakimuʻa ʻi he fatongia ʻo Haʻa Fokololó.  Pea ohi hake ai pe ʻae fānau ʻa ʻAkauolá he fatongiá, ʻo nau ʻiloa koe Kau Moalá, he ne akoʻi pe kinautolu ko ʻenau sio pe mo ala, sio pe mo ala.  

Pea naʻe tuʻumālohi mo Sanini he fatongia 'o Haʻa Fokololó.  Ne mālieʻia ʻa houʻeiki ʻi hono faiva koe hīʻatu 'i moana kae tauhi kumete mai ki ʻuta.  Pea ko ʻene fulifulihi mai ʻae vaí 'oe 'atu ʻi kumeté, ne ui ai ʻe houʻeiki ko Fulivai.
     
Pea tuku mai ‘e he Tui Ha’atakalauá ‘e ne motu’a ko Tovi ke haʻu ʻo fokotuʻutuʻu e nofo ‘a Ngata mo hono kāingá.  Naʻe tofa leva e foto tehina 'o 'Amá koe Kano Loto'ā 'oe Haú, pea tō honau fatongiá koe tauhi moe maluʻi ʻoe sino ʻo Ngatá.  Pea tofa moe fanga foha ‘o Molofasa Tau’ili’ilí koe Haʻa Molofahá, pe koe Fale Haʻa Kilí, pea tō mo honau fatongia koe tokangaʻi e nofoʻanga ʻo Ngatá.  

ʻA ia koe Kano Lotoʻā ʻoe Haú koe fototehina ʻo ʻAmá, koe fanga tamai ia ʻa Tohuʻiá ... ko Fa‘oa, Nāpaʻa, MonūLei’ataua mo Tovi.  
 
Pea koe Haʻa Molofahá pe Fale Haʻa Kilí, koe fanga faʻetangata ia ʻae faʻē ʻa Tohuʻiá ... ko Kamoto, Uhi, Kioa mo Ngalungalu

Pea kuo ʻalu eni e taimí, kuo fatu tangata ʻa Ngata.  Pea sio e houʻeiki kuo tokolahi ʻa Tatakamotonga.  Pea nau fonofono leva na kuo taimi lelei ke ʻalu a Ngata mo hono kāingá, ke nau oo ʻo tokangaʻi mai e Lausiʻí, he kuo ongona mai e longolongoaʻa mei Hihifo.            
 
Pea koe hoko mai eni ki he taimi ʻoe ‘Inasi fakamuimui taha pea hiki ʻa Ngata mo hono kāingá mei Tatakamotongá.  Na’e tānaki mai e ‘Inasí ki he Tu’i Ha’atakalauá, kia Mo’ungatonga, ko hono fatongia ki he Tuʻitongá.  Pea kuo haʻu kotoa ai e fonuá.  Haʻu ai moe tangata ko Mafí mei Fukavé, ʻae tama ʻa Fāʻogenuʻú.  Koe haʻu ko ia ʻa Mafí, kuo fuʻu tangata, pea mahalo ne fotu tatau pe mo hono taʻoketé, pe koe ʻilonga mavahe pe ʻene kaukaua mo nima mālohi ʻi he fatongiá, pea naʻe fakatokangaʻi ai ʻe he taha kotoa ʻo aʻu kia Lauaki.    

Pea koe taimi ko eni, kuo hela ʻa Lauaki he fatongia tokotahá.  Pea fakataufolofola atu ‘a Lauaki ki he Tu’iha’atakalauá, ke ʻai aa ha taha ke na fatongia, ke haʻu ia ʻo fai kātoanga, kae taufataha pe ia, ʻa Lauaki, ki he pulonga ʻae fonuá.  Pea mokoi ki ai ‘ae fingalo ʻoe Tu’íha’atakalauá.  

Pea koe fili ʻa Lauakí ko Mafi mei Fukave, ʻae tama ʻa Fāʻogenuʻú.  Pea koe ʻaho hono pongipongi ne ui atu ‘a Lauaki kia Mafi pe koe ha e hingoá.  Pea tali mai ko Mafi.  Pea ui atu pe ko Mafi mei fe.  Pea tali mai ko Mafi mei he Motu ‘a Puaká.  Pea tapakina leva ‘a Lauaki ... ʻAve ia ma’a Mafi Motu ‘a Puaka. 

Pea ne hoko ai pe ʻo 'iloa ʻa Mafi mei he Motu ʻa Puaka ko Motu'apuaka.  Pea fatongia ai pe ʻa Motuʻapuaka mei he ngaahi ʻaho ko ia ʻi he mata’u ‘oe ʻOlovahá.  Pea ne hoko koe taki ʻi he fua fatongia ʻae kāinga ʻene faʻeé, ʻae Kanolotoʻaʻoehaú pea moe Haʻa Molofahá pe Fala Haʻakilí, ki hono taʻoketé, ʻa Ngata.  Pea fai ange ʻo fanau ʻa Motuʻapuaka, pea nau 'iloa koe Kau Mafi.  Kae hoko atu ai pe ʻa Lauaki ʻi he hema oe Olovahá, pea mo hono hakó, ʻae Kau Maʻú.       

Pea taku mei ai, ne ʻosi maau pe ʻae Pangai ia ʻo Ngatá ʻi he ʻaho ne tukufolau ai mei Tatakamotonga mo hono kaingá.  Koe tango ia ʻa ʻAmá, naʻá ne pole pea talamuka ʻo tuʻufonua he ʻotu Tongá.   

Pea ʻaloʻofa ʻia Ngata ʻa Halakitauʻā pea mo Vaoloa, ʻo na hoko koe ongo ʻalofi ne huli hake koe ʻUlutolú.  Ka koe talanoa kehe ia ki ha ʻaho ʻe taha.             




Ngaahi Liliu
[150315] Fokotu'u fo'ou e peesi´.  
[150315]
Kuo lahi e ngaahi fakamatala kehekehe ki he tupu’anga ‘oe ngaahi hingoa tupu’á ni.  ʻE ‘ikai toe ‘i ai ha fakamatala ia ‘e lava ‘o tonu peseti ‘e teau, pea koe fakamatala kotoa pe ʻe feholoi pe ia moe vakai ʻae taha naʻa ne fokotuʻutuʻú.  Koe fokotu’utu’u ‘oku fakahā atu hení koe feinga fakafoʻituitui pe ia ke fakahoa mo fakaʻfāʻutaha e ngaahi fakamatalá, ngaahi tohi hohokó, pea moe lele ʻae taimilainé, ke maʻu ha Tala ʻoku ne makupusi ʻae hisitōlia pea moe ngaahi fehokotakí.  ʻOku hokohoko atu pe hono okooko ‘oe fakamatalá. 

JamesCocker14Nov00