Fefine'i moe Tangata'i Fonua
Koe konga mahu'inga 'oe Hisitōlia 'o Tonga´ 'oku 'i he mo'ui moe ngaahi ngāue 'ae kakai 'oe fonua´.  
'Oku fakamālō'ia mo fakamanatu ʻi he peesi´ ni 'ae fefine'i moe tangata'i fonua 'o Tonga
kuo tau ʻinasi fiefia kotoa ʻi heʻenau ngaahi ngāue´ mo honau ngaahi talēniti´.

Tu’imala Kaho
Koe Naitingikeili ‘oe ʻOtu Tongá


Koe fakamatala eni ʻa Ruby Maʻafu koe tamaʻihefono ʻa Tuʻimala Kaho, pea ʻoku ʻoatu e fakamālō mavahe ki ai ʻi heʻene loto lelei ke vahevahe atu heni ʻa ʻene fakamatalá.
 


Ko Tu’imala Kahó na’e fanau’i ko ‘Anaise ‘Anaukihesina Tu’imala Kahoʻ'i he ʻapi ko Loloniú, ʻi Kolofo’ou, Nukuʻalofa, Tonga.

Na’e tupu hake pē ‘a Tu’imala Kaho ‘i ha fāmili faiva peá ne manako ki he tau’olungá moe hivá mei he‘ene kei si’í.  Ko ‘ene ongo mātu’á ko Sioeli ‘Alukuoʻulu Payne Kaho pea mo ‘Anamalia Katoʻone Veiongo Lata‘ihōlevafoʻou Hopoate Kaho.  Naʻe akoʻi pē ʻe he‘ene fa’é, ‘Anamalia, mo ‘ene fa’etangatá, Vaisima Hopoate, pea mo Kefu Tauelangi ‘ene ngaahi tau’olungá.

‘I he‘ene kei si’í, naʻe faʻa kau ʻa Tuʻimala Kaho ʻi he ngaahi tau’olunga talitali ʻoe kau folau mahu’inga mei Tu’apule’anga ki Tongá ní, kau ai e talitali ʻoe Tu’i Pilitānia´ ʻi he ‘api Konisela Pilitania´.  Na’e fekau leva 'e he taʻahine Kuiní, Sālote Tupou III ke fa’u hano hiva mo haʻane tauʻolunga kene tauʻolunga ‘aki he ngaahi kātoanga pehé ní.  Na’e faʻu ai ‘e Semisi ‘Iongi pea fakafasi ‘e Vaisima Hopoate pea mo Sione Tu’ifua ‘a hono ongo foʻi fasi tauʻolunga ‘e ua, koe "Hala Vuna" (pe koe Tēkipuna) pea moe "Melitiane ‘Uluaki", pea akoʻi ‘e Kefu Tauelangi ʻene tauʻolungá.

Koe fuofua hiva ne faʻu ‘e Tu’imala Kahó, koe "Taumaia ke ke ‘Iloa" ‘i hono taʻu 18, lolotonga ia ‘ene ako ʻi he ‘Apiako Saint Joseph ʻae Katoliká.  Mei he taimi ko ia ki he ‘ahó ni, kuo lahi ʻaupito ‘ene ngaahi faʻú mo ‘ene ngaahi hivá, ‘oku ‘ikai ke ne kei fakalaua.  Ka koe me’a ‘oku mahinó, ko ‘ene faʻu moe hiva ‘oku manako lahi taha aí koe "Lose Hina ‘o Kahala", ki he‘ene tama kuo pekiá, ‘a Heimataura Salmon Anderson Tukuʻaho.

ʻI he 2008 na‘e fakahaka ai ʻe Tuʻimala Kaho ʻae haka ‘ae kakai fefiné ʻi he Lakalaka ‘ae Laione ‘o Kolofo’oú ki he kātoanga Hilifaki Kalauni ‘o Tupou V.  Koe fa’u moe hiva fakamuimui ‘a Tu’imala Kahó koe ‘Ūpē ‘oe ‘Alo ʻo Kalaniuvalu-Fotofilí, koe "Tutulu ʻae Ta’ahine Kuini Fehuhú Halaevalu Mata’aho ki hono ‘Aló, Siaosi Tupou V pea moe Tangi ‘ae Ta’ahine ko ‘Eiki Lupepau’u Tuitá ‘i he Hala ʻae Tamasiʻi ko Siaosi Tupou V".

Koe ngaahi fonua moe ngaahi kolo kuo folau ki ai ‘a Tu’imala Kaho koe ‘uhī pē ko hono talēnití ʻoku kau ki ai ʻa Haʻamoa, Fisi, Kūamu, ʻAositelēlia, Kōlea, ʻIngilangi, Sikotilani, Honolulu pea mo ʻAmelika Lahi.

Koe ngaahi mētali kuo foaki fakalangilangi kia Tu’imala Kaho ki he‘ene ngāue lavameʻa ‘i he mala'e 'oe faivá moe hivá koe Mētali foaki ‘e Tupou V ʻi he‘ene Hilifaki Kalauní moe Mētali ʻi he Siupeli Siliva ʻoe ʻApiako Saint Joseph.

ʻI he ngaahi ‘ahó ni ʻoku ʻiloa ‘a Tu’imala Kaho koe Punake ʻo Kolofo’ou, tānaki ia ki hono talēniti Faʻuhiva Laulōtahá, kae ʻumaʻā hono Leʻo Hāhāmolofia mo Fakangalongataʻa kuo hoko ai ʻo ʻiloa koe Naitingikeili ʻoe ʻOtu Tongá.  


Ngaahi Nouti moe Ngaahi Liliu
[010613] Fakaheka e peesi´.

JamesCocker14Nov00