Tangi mai ke ta Fihi Ko e Tohi Hohoko 'o e Fāmili ʻo Sione Niua Lātū mo Vāsiti Teukialupe Ulamoleka Lātū 'o Nuku'alofa, Ongo Niuá, Kolonga mo Hāʻutu. 'Oku tauhingoa 'a e tohi hohokó ni ki he 'ofefine lahi 'o Sione Niua Lātū mo Vāsiti Teukialupe Ulamoleka Lātū, ko Mele Vaioleti Loukakatisi Tangimaiketafihi Lātū Saffings. 'Oku 'ikai ngata pe he fe'unga mo ia ko e 'ofefine lahi, ka 'oku hoalelei mo e faka'amu 'a e tohi hohokó ni ke takafia ma'u pe 'i manatu 'a e ngaahi fehokotaki ne tau tupu aí. 'Oku ʻoatu e fakamālō ki he fāmili moe kāinga kotoa kuo mou vahevahe mo tokoni mai ki hono fokotu'utu'u 'o e tohi hohokó ni. Ko e ngāue eni 'a James Cocker, ko e taha mo ia ʻi he fanga makapuná, pea 'oku hokohoko atu pē hono fokotuʻutuʻu mai ʻo e ngaahi fakamatalá ki he tohi hohokó ni. 26 Siulai 2024 Ko e Tupu'anga 'o Sione Niua Lātū Sione Niua Lātū 'Oku 'oatu e fakamālō kia Jocelyn Alice Jones Lui, ko e mokopuna ua 'o Sione Niua Lātū, 'i hono vahevahe mai 'o e 'ata ko eni 'o Sione Niua Lātuú. Ko Sione Niua Lātuú ko 'ene mātu'á ko Penisimani Tu'etau pea mo Luseane Fifitahōleva. Ko Luseane Fifitahōlevá ko e ʻofefine ʻo Tauholaʻivailahi Mā pea mo Foʻifā Lomu ʻo Muʻa, Niuafoʻou. Ko Penisimani Tuʻetaú ko e foha ʻo Tuʻetau ʻo Angahā, Niuafoʻou, ʻa ia naʻe toe ʻiloa ʻaki hono hingoa he lotú ko ʻAisea Lakalakahelotu. Pea ko e faʻē ʻa Penisimani Tuʻetaú ko Pauline Fehiʻa Tangihake ʻo Vaipoa, Niuatoputapu. Ko Tuʻetaú ko e foha ʻo Fotofili Lupoutuʻu mo e ʻofefine ʻo Lavelua ʻi ʻUvea ko Tapukitea. Ko Pauline Fehiʻa Tangihaké ko e ʻofefine ʻo Tupa ʻEliesa Kongaikamanu pea mo Sinālauliʻi, ʻoku pehē ʻe he faʻahinga ko e fefine Haʻamoa, pea pehē ʻe he fa'ahinga ko e ʻofefine ʻo Pau TT36 ʻi Niua. Ko Tuʻetau ʻAisea Lakalakahelotu mo Pauline Fehiʻa Tangihake Ko e fānau ʻa Tuʻetau ʻAisea Lakalakahelotu mo Pauline Fehiʻa Tangihake ʻoku aʻu ki ai ʻa e ʻiló ko: 1. Meliame ʻAtelaite Tonga 2. Mele Maʻumounu Makahola 3. Moalamuli 4. Soko 5. Penisimani Tuʻetau Nouti mo e Ma'ungatala: * Fānau ʻa ʻAisea Lakalaká: Tohi Hohoko ne vahevahe mai ʻe Fololini ʻUluʻave Havea, 1996. Mālō Fololini. Ko Penisimani Tuʻetau mo Luseane Fifitaholeva Ko e fānau ʻa Penisimani Tuʻetau mo Luseane Fifitahōleva ʻoku aʻu ki ai ʻa e ʻiló ko: 1. Sione Mahe 2. Sione Niua Lātū 3. Līvai 4. Ane Kautaha Ngāngā ʻOku ʻikai maʻu ha toe fakamatala kia Sione Mahe mo Līvai, kae ʻumaʻā ha lau ki haʻana fānau. Kae fakamālō ne lava tolonga mai e ngaahi fakamatala kia Sione Niua mo Ane Kautaha Ngāngā. Ko Sione Niua Lātū ʻI he kei si'i 'a Sione Niuá naʻe kaiha'asi ia mei he mataatahi 'i Niuafo'ou ʻe he kau pōpula 'o 'ave 'i he vaka. Ne fai atu ʻo faingatāmaki e folaú pea iku ʻo hala ha me'akai mo e vai. Ne lau ʻaho pea fanongo atu ʻa Sione naʻe talanoa e kau pōpulá ke tamate'i ia ke nau kai. Ka ko e lolotonga ko iá kuo hā mai e fonua, pea vakai ange ko Fisi ia. ʻI heʻenau tūʻuta atá na'e haʻu e kau Fisí mo e meʻakai ke nau kai. Pea ko e ʻosi pe ʻenau kaí kuo tō e kau pōpulá ʻo mate ka e kei moʻui pe ʻa Sione Niua. Naʻe ʻave leva ʻe he kau Fisí ʻa Sione Niua ki he kau tā ukameá, pea nau akoʻi ia ʻo poto he tā ukameá. Ne ʻave hono talanoá ko e kaihaʻasi mei Niuá, ʻo fai pe ʻo toe feʻiloaki mo hono kāingá mo e fāmili ne folau ange ki Fisí. Ne ngaue ai pe 'a Sione Niua 'i Fisi pea folau mei ai ki Haʻamoa ʻo ngāue ai. Ne mali ai ʻa Sione Niua mo e Fefine Haʻamoa, ka ʻoku ʻikai ha maʻu ki hono hingoá, pea ne ʻikai haʻana fānau. 'I he taimi ko iá kuo taʻane ʻa Kuini Lavinia mo e Tuʻi Uá ʻi Tonga. Ko Kuini Laviniá ko e tupu ʻia Tōkanga Hahau, ko e tuofefine ʻo Tuʻetau, kui ʻa Sione Niuá. Pea ne fiemaʻu ha taha ke tokangaʻi e ngaahi saliote ki Lotoʻaá. Feʻunga ia mo e folau mai ʻa Sione mei Haʻamoa ki Tonga ʻoku poto he tā ukameá. Ko ia ne nofo ai pe 'a Sione Niua ʻi Kolofoʻou 'o tauhi atu e ngaahi salioté ki Lotoʻā. Pea fai ʻo na maheni 'o mali ai mo Teukialupe Ulamoleka. Nouti mo e Ma'ungatala: * Ngaahi talanoa ʻa ʻeku Tamaí, James Cecil Cocker, mo hono feesi kāsini, Pōnita Heletā Tangitau, ko e talanoa hangatonu ange ia kiate kinaua ʻa ʻena Kuí, Sione Niua Lātū. Ko Ane Kautaha Ngāngā Ko Ane Kautaha Ngāngaá ko e tuofefine pe ia ʻe taha ʻo Sione Niua Lātū. Naʻe mali ʻa Ane Kautaha Ngāngā mo Uate Paasi ʻo Muʻa, Niuafoʻou, pea ko hona ʻofefiné ko Latai Sepi Paasi Māʻanu ʻo Fangaʻuta. Ko Latai Sepi Paasí naʻe mali mo Holi Tangaloa ʻo Niuatoputapu ʻo na fanauʻi ʻa: 1. Fakataha Holi 2. ʻEfalame Holi 3. Hulitā Holi Ne fanau 'a Latai kia Hokafonu ʻo Houma 'o ʻi ai ʻa: 4. Lolo Hokafonu Pea toe mali ʻa Latai mo Pongi Pita Mafi ʻo Fata'ūlua, Niuafo'ou, ʻo na fanauʻi ʻa: 5. Hefa Pongi 6. 'Atelaite Tonga Viau 7. Sione Pongi 8. Mele Vaioleti Loukakatisitangimaiketafihi Kanovatu Hakula-'i-'Ahofakatau Vaka. Ko e fakahingoa kia Mele Vaioleti Loukakatisitangimaiketafihi Saffings 9. 'Ana Tamutamu Fuko 10. 'Ofa Pongi 11. Vaikeli Pongi 12. Paula Pongi Mafi Nouti mo e Ma'ungatala: * Fokotuʻutuʻu mei he ngaahi fakamatala ʻa hoku ongo kāsini ko Mataele Fuko pea mo Sela Pāhulu. Mālō Mataele mo Sela. Ko e Tupu'anga 'o Vāsiti Teukialupe Ulamoleka Lātū Ko Vāsiti Teukialupé ko e ʻofefine ʻeveʻeva ia ʻo Sitīveni Ulamoleka 'o Neiafu, pea mo 'Amelia Fīnautu'ava'inga 'o Kolonga mo Hā'utu. Ko Vāsiti Teukialupé na'e folau kei finemui ki Fisi pea na'á ne 'ave hono fanga tehiná ki Fisi, pea nau fefolau'aki ai pe ki Fisi mo Tonga. 'Oku 'ikai ma'u ha fakamatala pau pe ko e hā ne tupu ai e fefolau'aki ki Fisí. Ka ne iku 'o fe'iloaki 'a Vāsiti Teukialupe mo hono 'ofa'angá ko Sione Niua Lātu 'i Fisi pea na toki foki mai ki Tongá. Na'e hokohoko atu ai pē 'a e fefolau'aki ki Fisí 'i he fāmilí, 'o iku ai e konga 'o e fānaú mo honau hakó 'o nofo Fisi ai pē 'o a'u ki he 'ahó ni. Ko e Famili 'o Sione Niua Lātū mo Vāsiti Teukialupe Ulamoleka Lātū Ko e fānau 'a Sione Niua mo Vāsiti Teukialupe Lātū ko: 1. Mele Vaioleti Loukakatisi Tangimaiketafihi Saffings 2. Lavenia Moli’ahu Heletā 3. Manase Fatuimoana (Manase Māmahi) Lātū 4. 'Ālisi Pauline Mafile’o FakahēkiSuva Cocker 5. Sela Tu’ifua Bonita Rounds Ko Mele Vaioleti Saffings mo ʻĀlisi Cocker, mo honau tuongaʻané ko Manase Māmahi Lātū. Ngaahi Liliu [260724] Fokotuʻu ʻo e peesí ni.